“ಭೃಂಗಿ ನಡೆಯ ಮಾಲಿ” ಈಗ ಋತುಮಾನ ಮೊಬೈಲ್ ಆ್ಯಪ್ ನಲ್ಲಿ ಕೊಳ್ಳಲು ಲಭ್ಯ

ಭೃಂಗಿ ನಡೆ ಎನ್ನುವುದು ಕವಿ ಪುತಿನ ಅವರ ಮಾತು. ಶಿವನ ಆಸ್ಥಾನದ ನರ್ತಕ ಭಂಗಿಗೆ ಮೂರು ಕಾಲು. ಎರಡು ಸಮಕಾಲಗಳೊಂದಿಗೆ ಒಂದು ಗಿಡ್ಡ ಕಾಲು. ಅವನ ನರ್ತನ ರೂಢಿಗತಿಯ ಪರಿಚಿತವಲಯದಲ್ಲೇ ಸಾಗುತ್ತಿರುವಾಗ ಅಚಾನಕ್ಕಾಗಿ ಈ ಗಿಡ್ಡಗಾಲು ತೊಡರಿಕೊಂಡು ಆ ನೃತ್ಯಕ್ಕೆ ಅನಿರೀಕ್ಷಿತ ಗತಿಯೊದಗಿಬಿಡುತ್ತದೆ. ನೃತ್ಯ ಪರಿಚಿತ ವಲಯದಿಂದ ಹೊರಬಿದ್ದು ತನ್ನ ಕೆಡವಿ ನಿಲ್ಲುತ್ತದೆ. ಕಲೆಗಾರನೂ ರಸಿಕನೂ ತನ್ನ ಕೈಲಿರದ ಈ ಕ್ಷಣಕ್ಕಾಗಿ ತಾನೇ ಕಾಯುವುದು. ಮಾಲಿಯನ್ನು ಕುರಿತು ಈ ಅಂಶವನ್ನು ಸೂಚಿಸಿದ್ದು ಇಂಥದೇ ವಿಸ್ಮಯದ ಗತಿಯ ಸಾಹಿತಿ ದೇವನೂರ ಮಹಾದೇವ. ಮಾಲಿಯ ಸಂಗೀತದಲ್ಲಿ ಸಂಭವಿಸುವ ಅನಿರೀಕ್ಷಿತ ತಿರುವುಗಳನ್ನೂ ಅದು ಒತ್ತರಿಸುವ ಗಡಿಗಳನ್ನೂ ಕಂಡವರಿಗೆ ಈ ಹೆಸರಿನ ಔಚಿತ್ಯ ಸ್ಪಷ್ಟ.