ರಮೇಶ್ ಅರೋಲಿ ಕವಿತೆ : ನೇಣಿನ ಹಕ್ಕಿ

ದಿಕ್ಕು ದಿಕ್ಕಿಗೆ ಉಯ್ಯಾಲೆ
ನೀನು ದಿಕ್ಕಿಲ್ಲದ ಹಕ್ಕಿಯೆ ಉಯ್ಯಾಲೆ
ಮಡಲಿಗೆ ಬಂದಾಗ ಮನೆಯೆಲ್ಲ ತುಂಬಿತ್ತು
ಅಂಬೆಗಾಲಿಡುವಾಗ ಅಂಗಳ ನಕ್ಕಿತ್ತು
ಹೆಸರಿಟ್ಟು ಹೆತ್ತವರೆ ಉಯ್ಯಾಲೆ
ನಿನ್ನ ತೊಟ್ಟಿಲು ಹರಿದಾರೆ ಉಯ್ಯಾಲೆ

ಓಣಿ ಓಣಿಗೆ ಉಯ್ಯಾಲೆ nh_21
ನೀನು ನೇಣಿನ ಹಕ್ಕಿಯೆ ಉಯ್ಯಾಲೆ
ಕರಳುಗಂಟಿದ ತಮ್ಮ ಕೈ ತುತ್ತು ಕೊಟ್ಟಮ್ಮ
ಕೇಳದಾದರೆ ಯಾರು ನಿಟ್ಟಿಸಿರು ಕೂಗಮ್ಮ
ಗೆಜ್ಜೆ ಕಟ್ಟಿದ ಬೆರಳೆ ಉಯ್ಯಾಲೆ
ನಿನ್ನ ಚೆಟ್ಟಕ್ಕೆ ಬಿಗಿದಾವೆ ಉಯ್ಯಾಲೆ

ವಾಡೆ ವಾಡೆಗೆ ಉಯ್ಯಾಲೆ
ನೀನು ಗೋಡೆ ಮ್ಯಾಲಿನ ಹಕ್ಕಿ ಉಯ್ಯಾಲೆ
ಬೇರಿಗಿಲ್ಲದ ಮಾನ ಹೂವಿಗೆ ಜುಲುಮೆನ
ನದುರುಬೊಟ್ಟೆ ನಿನ್ನ ಹೊಟ್ಟ್ಯಾಗ ಕುಲುಮೆನ
ಕಾಡಿಗೆ ಉಬ್ಬೆಲ್ಲ ಉಯ್ಯಾಲೆ
ನಿನ್ನ ಕಣ್ಣಾಗ ನಾಟ್ಯಾವೆ ಉಯ್ಯಾಲೆ

ಕೇರಿ ಕೇರಿಗೆ ಉಯ್ಯಾಲೆ
ನೀನು ಕೆರೆದಂಡೆ ಹಕ್ಕಿಯೆ ಉಯ್ಯಾಲೆ
ಸಣ್ಣಾಕಿ ದೊಡ್ಡಾಕಿ ಸಂಜ್ಯಾಗ ಕೂಡ್ಹಾಕಿ
ಕಂಡ ದಾರಿಗೆಲ್ಲ ಒಂದೊಂದು ಕಣ್ಣಾಕಿ
ಹುಟ್ಟಿದ ಒಲವಿಗೆ ಉಯ್ಯಾಲೆ
ನಿನ್ನ ಬದುವಲ್ಲೆ ಸುಟ್ಟಾರ ಉಯ್ಯಾಲೆ

ಗಲ್ಲಿ ಗಲ್ಲಿಗೆ ಉಯ್ಯಾಲೆ
ನೀನು ಗರಿಯಿಲ್ಲದ ಹಕ್ಕಿಯೆ ಉಯ್ಯಾಲೆ
ಕಳ್ಳುಬಳ್ಳಿಯ ಬಳಗ ಕಣ್ಣು ಮಿಟುಕದ ಹೊತ್ತು
ಕಲರು ಟೀವ್ಯಾಗ ಕಂಡಾರೆ ನಿನ ಕತ್ತು
ಗಳಗಳನೆ ಅತ್ತಾರೆ ಉಯ್ಯಾಲೆ
ನಿನ್ನ ಗೋರಿಯ ತೋಡ್ಯಾರೆ ಉಯ್ಯಾಲೆ

nb1 - Copy

ಚಿತ್ರಗಳು: ನಿಹಾರಿಕಾ ಶೆಣೈ

ರಮೇಶ್ ಆರೋಲಿ

ರಮೇಶ್ ಅರೋಲಿ , ಬಯಲು ಸೀಮೆಯ ರಾಯಚೂರಿನ ಅಸ್ಕಿಹಾಳದಲ್ಲಿ ಹುಟ್ಟಿ, ಕರಾವಳಿಯ ಕಾರವಾರದಲ್ಲಿ ಪತ್ರಕರ್ತರಾಗಿ ದುಡಿದು ಮಲೆನಾಡಿನ ಸಾಗರದಲ್ಲಿ ಅತಿಥಿ ಉಪನ್ಯಾಸಕರಾಗಿ ಇದೀಗ ರಾಜಧಾನಿ ದೆಹಲಿಯ ಕಮಲಾ ನೆಹರು ಕಾಲೇಜಿನಲ್ಲಿ ಸಹ ಪ್ರಾಧ್ಯಾಪಕರಾಗಿದ್ದಾರೆ.
‘ಎಳೆಯ ಪಾಪದ ಹೆಸರು ನಿಮ್ಮಿಚ್ಛೆಯಂತೆ ಇಟ್ಟುಕೊಳ್ಳಿ’ (2010) ಕವನ ಸಂಕಲನಕ್ಕೆ ಕರ್ನಾಟಕ ಸಂಘ ಶಿವಮೊಗ್ಗದ ಡಾ.ಜಿ.ಎಸ್.ಶಿವರುದ್ರಪ್ಪ ಕಾವ್ಯ ಪ್ರಶಸ್ತಿ, ‘ಜುಲುಮೆ’ ಸಂಕಲನಕ್ಕೆ ‘ಡಾ.ಪು.ತಿ.ನ. ಕಾವ್ಯ ನಾಟಕ ಪುರಸ್ಕಾರ’ (2014) ಮತ್ತು ಬಿಡಿಗವಿತೆಗಳಿಗೆ ಸಂಚಯ, ಸಂಕ್ರಮಣ, ಪ್ರಜಾವಾಣಿ ಕಾವ್ಯ ಸ್ಪರ್ದೆಯಲ್ಲಿ ಬಹುಮಾನ ಲಭಿಸಿವೆ.

ಪ್ರತಿಕ್ರಿಯಿಸಿ