ಋತುಮಾನಕ್ಕೆ ಐದು ಸಂವತ್ಸರಗಳು

ಪ್ರಿಯ ನಿತೇಶ್ ಮತ್ತು ಋತುಮಾನದ ಜೀವನಾಡಿ ಬಳಗದ ಎಲ್ಲ ಸ್ನೇಹಿತರೇ,

ಎಂಥ ಸಂಭ್ರಮದ ದಿನ ಇದು! ಸುಸ್ವಪ್ನವೊಂದನ್ನು ಸಾಕಾರಮಾಡುತ್ತ, ವಾಸ್ತವದಲ್ಲಿ ಪೊರೆದು, ಬೆಳೆಸುತ್ತ ಆರನೆಯ ಸಂವತ್ಸರದ ಹೊಸ್ತಿಲಿಗೆ ತಂದಿದ್ದೀರಿ. ದೊಡ್ಡ ಸಾಹಸವಷ್ಟೇ ಅಲ್ಲ ನಿಮ್ಮದು, ಶುದ್ಧವಾದ ಮನಸ್ಸುಗಳ, ಶುದ್ಧವಾದ ಅಂತಃಕರಣದ ಸೃಜನಶೀಲ ಯಜ್ಞ. ತತ್ತ್ವಜಿಜ್ಞಾಸೆ, ಸಾಮಾಜಿಕ-ಆರ್ಥಿಕ-ಐತಿಹಾಸಿಕ ಅಧ್ಯಯನ, ರಾಜಕಾರಣದ ಕುರಿತ ಚಿಂತನೆ-ವಿಶ್ಲೇಷಣೆ, ಸಾಹಿತ್ಯದ ವಿಮರ್ಶೆ ಮತ್ತು ಮೀಮಾಂಸೆ, ರಂಗಭೂಮಿ ಕುರಿತ ಚಿಂತನೆ, ಶಾಲಾಕಾಲೇಜು ಶಿಕ್ಷಣದ ರೀತಿನೀತಿಗಳ ಪರಾಮರ್ಶೆ, ಪ್ರಾದೇಶಿಕ ಸಂಸ್ಕೃತಿ ಮತ್ತು ಭಾಷೆಗಳನ್ನು ಕುರಿತ ಧ್ಯಾನ, ಕವಿತೆಗಳ ಪ್ರಕಟಣೆ ಮುಂತಾಗಿ ಮುಂತಾಗಿ ಎಷ್ಟೊಂದು ಬಗೆಯ, ಎಷ್ಟೊಂದು ಉತ್ಕೃಷ್ಟವಾದ ಬರಹಗಳನ್ನು, ವಿಡಿಯೋಗಳನ್ನು ವಿವೇಚನೆಯಿಂದ ಆಯ್ದು ಪ್ರಕಟಿಸಿದ್ದೀರಿ, ನಮ್ಮ ಧೀ ಎಂಬುದನ್ನು ಬೆಳಗಿಸಿದ್ದೀರಿ! ಈ ಐದು ಸಂವತ್ಸರಗಳಲ್ಲಿ, ಎಲ್ಲಿಯೂ, ಅಗ್ಗವೂ ಹುಸಿಯೂ ಸಲೀಸಾದದ್ದೂ ಆದ, ತಥಾಕಥಿತ, ಜನಪ್ರಿಯತೆಯ ವರಸೆ ತೋರದೆ, ಘನವಾದ ವಸ್ತು-ವಿಷಯವನ್ನು ಹೊತ್ತಿರುವ ಘನವಾದ ತಾಣವೇ ಆಗಿದ್ದೀರಿ.

ಅಷ್ಟೆಲ್ಲವನ್ನು ಮಾಡುವುದರ ನಡುವೆ, ಹೆಚ್ಚು ಕಮ್ಮಿ ನಿಮ್ಮ ಧ್ಯೇಯವಾಕ್ಯವಾಗಿ, ಉದ್ಘೋಷವಾಗಿ ಈ ಮಾತನ್ನು ಉದ್ದಕ್ಕೂ ಜಗತ್ತಿಗೆ ಸಾರಿದ್ದೀರಿ:

ಸಂವಿಧಾನದ ಮೂಲ ಆಶಯಕ್ಕೆ ವಿರೋಧವಾಗಿ ಭಾರತದ ಪೌರತ್ವವು ಧರ್ಮದ ಆಧಾರದಲ್ಲಿ ನಿರ್ಧಾರಗೊಳ್ಳುವುದನ್ನು ಋತುಮಾನ ಬಳಗ ವಿರೋಧಿಸುತ್ತದೆ ಹಾಗೂ ಪೌರತ್ವ ತಿದ್ದುಪಡಿ ಮಸೂದೆ ಹಿಂಪಡೆಯುವಂತೆ ಆಗ್ರಹಿಸುತ್ತದೆ.

‘ಋತುಮಾನ’ವು ತಾಳಿರುವಂಥ ನಿಲುವನ್ನೇ ತಾಳುತ್ತ ಬಂದಿರುವ, ನಮ್ಮನಿಮ್ಮೆಲ್ಲರ ಬಂಧುತ್ವದ ಪತ್ರಿಕೆಗಳು ಹಲವಿವೆ, ನಿಜ. ಆ ಪತ್ರಿಕೆಗಳು ಮತ್ತು ಅವುಗಳನ್ನು ನಡೆಸುವವರು ಕೂಡ ದೊಡ್ಡ ಕೆಲಸವನ್ನು ಮಾಡುತ್ತಿದ್ದಾರೆ, ಲೋಕಹಿತವನ್ನು ಕಾಯುವ ಕೆಲಸ ಮಾಡುತ್ತಿದ್ದಾರೆ. ನೀವು, ಅವರು ಎಲ್ಲರೂ ಇರುವುದರಿಂದಲೇ ನಮ್ಮ ಮನಸ್ಸಿನ ಒಳಿತು, ಲೋಕದಲ್ಲಿನ ಒಳಿತು ಉಳಿದು ಬಾಳುತ್ತಿದೆ. ಆದರೆ, ನನಗೆ ತಿಳಿದಮಟ್ಟಿಗೆ, ಕನ್ನಡದಲ್ಲಿ ಅಚ್ಚಾಗುವ, ಅಥವಾ ಸಂಗಣಕ ಲೋಕದಲ್ಲಿ ಪ್ರಕಟವಾಗುವ, ಬೇರೆ ಯಾವ ಪತ್ರಿಕೆಯೇ ಆಗಲಿ, ಋತುಮಾನದಂತೆ, ಈ ವಿಷಯದಲ್ಲಿನ ತನ್ನ ನಿಲುವನ್ನು ಇಂತಿಷ್ಟು ಮಾತುಗಳಲ್ಲಿ, ಹೀಗೆ, ನಿತ್ಯನಿರಂತರ ಎದೆಯ ಮೇಲೆಯೇ ಹೊತ್ತು ಕಾಣಿಸಿಕೊಳ್ಳುತ್ತಿಲ್ಲ.

ಇದಲ್ಲವೇ ಋತುವಿನ ಮಾನವನ್ನು, ಋತದ ಮಾನ-ಸಂಮ್ಮಾವನ್ನು ಕಾಯುವ ಕೆಲಸ…

ನಿಮಗೆ ಪ್ರೀತಿ, ಕೃತಜ್ಞತೆ; ಒಳಿತಿನ ಹರಕೆ, ಹಾರೈಕೆ.

– ರಘುನಂದನ
18 ಜುಲೈ 2021